Cefin Campbell AS Canolbarth & Gorllewin Cymru

Mae deiseb a lansiwyd ynghynt yr wythnos hon yn gwrthwynebu cynlluniau arfaethedig ar gyfer peilonau ar hyd Dyffryn Tywi, Sir Gaerfyrddin wedi ennill dros 1,000 o lofnodion. 

Mae’r ddeiseb, a drefnwyd gan Aelodau Senedd lleol Plaid Cymru Adam Price a Cefin Campbell, yn gwrthwynebu’r cynigion a amlinellwyd gan Bute Energy a all weld coridor o beilonau ar hyd y dyffryn - ac yn hytrach yn galw am osod y ceblau trydan o dan y ddaear. 

Yn gynharach eleni, ysgrifennodd y datblygwr ynni adnewyddadwy Bute Energy at dirfeddianwyr lleol yn Nyffryn Tywi yn amlinellu cynigion ar gyfer cysylltiad trydan 60 milltir 132Kv newydd o Barc Ynni Nant Mithil i’r dwyrain o Landrindod, i’r rhwydwaith trydan presennol rhwng Caerfyrddin a Phont Abraham. 

Mae'r cynigion, a allai weld peilonau 27 metr o uchder yn cael eu codi ar hyd y dyffryn, wedi achosi pryder yn lleol ynghylch yr effaith debygol ar harddwch naturiol a threftadaeth y dyffryn. Roedd dros 70 o drigolion yn bresennol mewn cyfarfod cyhoeddus yn Llanarthne fis diwethaf, yn ogystal â thorf sylweddol yn Llandeilo ar Nos Fercher 15fed o Chwefror, a chyfarfod pellach wedi ei drefnu gan y Gynghrair Cefn Gwlad yn Llanymddyfri ar nos Gwener 17 Chwefror. 

Bu i Cefin Campbell AS godi pryderon ynghylch y datblygiad arfaethedig gyda Gweinidog Newid Hinsawdd Llywodraeth Cymru. Yn ei gwestiwn yn gynharach y mis hwn cyfeiriodd at alw cynyddol yn y gymuned leol i unrhyw ddatblygiad grid o'r fath gael ei gladdu o dan y ddaear. 

Wrth wneud sylw wrth i’r ddeiseb gyrraedd dros 1,000 o lofnodion, dywedodd Aelod Senedd Plaid Cymru dros Ddwyrain Caerfyrddin a Dinefwr, Adam Price AS: 

“Mae’r ffaith bod y ddeiseb hon wedi denu dros fil o lofnodion mewn mater o ychydig ddyddiau adlewyrchiad clir o gryfder y teimladau yn lleol o fewn Dyffryn Tywi tuag at gynlluniau o’r fath. 

Mae'r ddeiseb yn cydnabod yr angen i ddatblygu prosiectau adnewyddadwy gwyrdd, ond mae'n pwysleisio y dylid gwneud hyn mewn modd cytbwys - gan gydnabod anghenion a buddiannau ein cymunedau a'n hamgylchedd naturiol. Fel cynifer o rai eraill, nid oes gennyf unrhyw amheuaeth, os yw fath gynigion am gael eu gwireddu, rhaid blaenoriaethau gosod y ceblau o dan y ddaear ar hyd Dyffryn Tywi, yn hytrach na pheilonau.” 

Ychwanegodd Cefin Campbell AS, Aelod Senedd Plaid Cymru dros Ganolbarth a Gorllewin Cymru: 

“Mewn ymateb i fy nghwestiwn yn y Senedd yn gynharach y mis hwn, cadarnhaodd y Gweinidog Newid Hinsawdd mai polisi Llywodraeth Cymru yw y dylid gosod ceblau trawsyrru trydan o dan y ddaear lle bo modd. 

Mae’r ddeiseb hon yn adleisio’r safbwynt hwn a byddai’n helpu i sicrhau bod harddwch naturiol a threftadaeth Dyffryn Tywi yn cael eu diogelu.” 

Mae’r ddeiseb, sy’n galw am osod ceblau o dan y ddaear ar hyd Dyffryn Tywi, i’w gweld drwy ddilyn y ddolen isod: 

https://www.adamprice.wales/no_to_dyffryn_tywi_pylons_na_i_beilonau_dyffryn_tywi